KELAHIRAN NABI MUHAMMAD S.A.W
Nabi muhammad putra abdullah
Siti aminah nama di ummi
Rabiul awal tanggai dua blah
Oh fajar beukah dhahernya nabi
Beungoh isnanyan meunan peuneugah
Dalam seujarah ulama rawi
Dendang yang peunoh rumoh aminah
Keunan troh langkah budiadari
Dum malaikat ucap kalimah
Geupujo allah ilahi rabbi
Seulaweut sare keu nabiyullah
Rasul yang meugah nyata kalahe
Bintang ngen buleun teuseunyum cerah
Langet meunyembah bumo memuji
Angen pih jipot leumbot sileupah
Suara indah ticem meunyanyi
Iblih ngen syaithan teurasa gundah
Ka apoh apah oh lahe nabi
Patong meuribee didalam ka’bah
Kahabeh patah mukjizat nabi
Raja sahuthan di laot mirah
Maksit sileupah le that korupsi
Harta ngen benda istana meugah
Kahabeh punah karam dalam ie
Nabi mihammad rahmat meulimpah
Keuhamba allah di muka bumi
Neuba ajaran agama yang sah
Akhlak yang indah budi pekerti
Neubasmi kaom yang jeheliah
Ajaran salah larang ilahi
Neuba bak jalan yang ridha allah
Neu syi’ar da’wah ajaran suci
Ingat saudara hai bunda ayah
Tapeumeuriah oh lahe nabi
Tabeut barzanji tabaca kisah
Hana meusalah tanyo meuzike
No comments:
Post a Comment